Hádegisfréttir

Hádegisfréttir 19. janúar 2026

Bandaríkjaforseti segist ekki verða að hugsa aðeins um frið, því hann fékk ekki friðarverðlaun Nóbels. Forsetinn hvikar hvergi frá áformum um innlimun Grænlands og háa tolla á ríki sem andmæla þeim fyrirætlunum.

Leiðtogar Evrópusambandsríkjanna koma saman á aukafundi á fimmtudagskvöld vegna deilu við Bandaríkjamenn um Grænland.

Mun fleiri eru óánægðir en ánægðir með að innviðaráðherra fresti Fjarðarheiðargöngum. Ráðherra mælir fyrir samgönguáætlun á Alþingi í dag.

39 létust og fimmtíu eru enn á sjúkrahúsi eftir mannskætt lestarslys á Spáni í gærkvöld. Tvær lestir með nær 500 um borð rákust saman.

Loðnuveiðar hófust austur af landinu í nótt. Lítill kvóti hefur verið gefinn út en leitarleiðangur fimm skipa er að hefjast.

Ekki er hægt að útvista störfum talmeinafræðinga án þess að það hafi áhrif á þjónustu, segir stjórn Félags talmeinafræðinga. Báðum talmeinafræðingunum á Reykjalundi var sagt upp í síðustu viku.

Lífshættuleg fölsuð lyf hafa verið í dreifingu á Íslandi. Réttarefnafræðingur segir mikilvægt að vera á varðbergi gagnvart sérstaklega hættulegu efni sem komið gæti til landsins.

50.000 tonna magnesíumverksmiðja gæti risið á Grundartanga í Hvalfirði ef áform Njarðar Holding ná fram að ganga. Þar á að vinna magnesíum úr sjó með nýrri aðferð.

Íslenska karlalandsliðið er komið áfram í milliriðlakeppni Evrópumótsins í handbolta. Alfreð Gíslason og liðsmenn hans í þýska landsliðinu eru hins vegar í slæmri stöðu.