Hádegisfréttir

Hádegisfréttir 4. janúar 2026

Forseta Venesúela, Nicolás Maduro, og eiginkonu hans er haldið í fangelsi í New York, eftir að Bandaríkjaher handtók þau í gær og flutti út landi. Trump segir að bandarísk olíufyrirtæki ætli að taka yfir olíuvinnslu í landinu.

Ísland á allt undir því að stórveldin viðri alþjóðalög og fullveldisrétt. Þetta segir prófessor í stjórnmálafræði. Utanríkisráðherra vilji augljóslega ekki styggja helsta bandalagsríki sitt þegar kemur að öryggis- og varnarmálum.

Rauði krossinn kom sjö íbúum í skjól eftir að eldur kviknaði í einbýlishúsi í Breiðholti í nótt. Engan sakaði en húsið er óíbúðarhæft. Lögregla skoðar eldsupptök.

Lögreglan lokaði afhendingarstöðum Nýju vínbúðarinnar og Smáríkisins í gærkvöld á grundvelli reglugerðar um smásölu áfengis. Eigandi Nýju vínbúðarinnar hefur óskað eftir fundi með lögreglustjóra.

Æðstiklerkur Írans segir að harkalega verði tekið á óeirðaseggjum í landinu. Tólf eru látnir í fjöldamótmælum gegn írönskum stjórnvöldum.

Eygló Fanndal Sturludóttir hlaut í gær nafnbótina íþróttamaður ársins 2025. Hún er níunda konan sem fær verðlaunin og sú fyrsta sem keppir í ólympískum lyftingum.