Hádegisfréttir

Hádegisfréttir 25. maí 2024

Um helmingur grunnskólabarna úr Grindavík hefur þegið sálfræðiaðstoð eða annan sálrænan stuðning eftir rýmingu bæjarins í fyrra.

Ekkert lát er á árásum Ísraelshers á borgina Rafah á suðurhluta Gaza, þrátt fyrir úrskurð Alþjóðadómstólsins í Haag í gær.

Formaður bæjarráðs Ölfuss harmar ákvörðun Ísfélagsins að hætta starfsemi í Þorlákshöfn. Fiskvinnslunni verður lokað í haust og hefur öllum þar sem vinna verið sagt upp.

Framkvæmdastjóri Atlantshafsbandalagsins vill að aðildarríki slaki á þeim kröfum að Úkraínumenn megi ekki beina vopnum sem þau fái frá vesturveldum að hernaðarlegum skotmörkum í Rússlandi. Afar erfitt sé fyrir Úkraínumenn að verjast þegar slíkt bann er í gildi.

Mikil ólga er á meðal foreldra í Sandgerði vegna leikskólans Sólborgar. Óttast er að mygla hafi tekið sig upp á ný í skólanum, en húsið var lagfært fyrir um ári síðan.

Hiti fór yfir 20 gráður á þremur stöðum á landinu núna í hádeginu. Veðurfræðingur hvetur fólk til að njóta sumarblíðunnar því kuldaskil ganga yfir landið um miðja vikuna.