Síðdegisútvarpið

Skrautlega kýr, alþingi, kartöflur og stærðfræði

Ertu á ferð um landið og með næmt auga fyrir kúm? Dóra Svavarsdóttir formaður Slow Food á Íslandi sagði okkur frá ljósmyndasamkeppni þar sem leitað er að skrautlegustu kúm landsins.

Ásdís Bjarnadóttir kartöflubóndi í Auðsholti skammt frá Flúðum sagði okkur frá kartöfluuppskerunni í ár.

Jóhann Hlíðar var í beinni frá Spáni og sagði okkur frá því að spánverjar fagna því um þessar mundir að 20 ár eru síðan samkynhneigðum varð heimilt að ganga í hjónaband og líka frá því að það er allt í háalofti í þorpi rétt hjá Cartagena, Torre Pacheco heitir það. Meira um það á eftir.

Alþjóðaheilbrigðismálastofnunin (WHO) hratt nýlega af stað nýrri áætlun sem hvetur ríki til þess að hækka raunverð á tóbaki, áfengi og sykruðum drykkjum um að minnsta kosti 50% fyrir árið 2035 með innleiðingu neysluskatta. Stofnunin segir neyslu þessara vara ýta undir faraldur langvinnra sjúkdóma á borð við hjarta- og æðasjúkdóma, krabbamein og sykursýki, og verðhækkun gæti komið í veg fyrir allt að 50 milljónir ótímabærra dauðsfalla næstu 50 árin. Halla Þorvaldsdóttir forstjóri Krabbameinsfélagsins kom til okkar að ræða þetta.

Við gerum upp vorþingið sem lauk í gær með tveimur nýliðum og fyrrverandi sveitastjórnarfólki. Þær Rósa Guðbjartsdóttir, Sjálfstæðisflokki og Kolbrún Áslaugar Baldursdóttir, Flokki fólksins, mættu til okkar í létt spjall.

Stelpur diffra eru sumarnámsbúðir í stærðfræði fyrir stelpur og stálp í framhaldsskóla. Markmið búðanna er að veita þessum hóp tíma og rými til að kynnast hvort öðru og kafa dýpra í þessa merku fræðigrein. Nanna Kristjánsdóttir, framkvæmdastýra búðanna, sagði okkur meira af þessu.