Síðdegisútvarpið

Brúarskóli, starfslok, hundahlaup og ómannúðleg megrun

Brúarskóli sem stofnaður var árið 2003 gegnir því mikilvæga hlutverki að vera mikilvægt úrræði fyrir nemendur sem þurfa á sérstöku stuðningsumhverfi um hríð að halda áður en heimaskólinn tekur við. Ólafur Björnsson skólastjóri Brúarskóla sagði okkur betur frá skólanum.

Réttarhöld hófust í dag í Gufunesmálinu svokallaða yfir fjórum karlmönnum og einni konu sem eru ákærð fyrir ýmis brot í tengslum við dauða manns sem var beittur hrottalegu ofbeldi í mars. Hugrún Hannesdóttir Diego fór yfir það sem fram hefur komið.

Í nýjum heimildarþáttum sem Netflix hefur tekið til sýninga er skyggnst bak við tjöldin á þáttunum Biggest looser sem nutu fádæma vinsælda bæði í Bandaríkjunum og víðast hvar um heiminn fyrir nokkrum árum. Tilgangurinn með þáttunum var að bæta heilsuna hjá fólki í yfirþyngd og hjálpa þeim að grennast en aðferðirnar sem notaðar voru eru ómannúðlegar og þátttakendur hafa glímt við alls kyns erfiðleika eftir þátttöku í Biggest looser. Ragga Nagli skrifaði áhugaverða færslu um þessa nýju þætti og við heyrðum í henni.

Af krafti inn í starfslok er námskeið hjá Endurmenntun í haust, en það er ætlað einstaklingum sem eru að huga að því að ljúka starfsævi, eru að minnka við sig vinnu eða eru þegar hættir á vinnumarkaði. Einar Þór Jónsson einn leiðbeinanda kom til okkar.

Hundahlaupið verður haldið í Mosfellsbæ í þriðja sinn á miðvikudag, en Canicross eða hundahlaup á vaxandi fylgi að fagna á Íslandi. Canicross er svokölluð hunda drifin íþrótt þar sem hlauparinn er með belti utan um sig og teygjutaum sem festist í beisli hundsins sem togar hlauparann áfram. Hlaupið hefur stimplað sig inn sem sannkölluð veisla fyrir hundaunnendur, en þátttakendur töldu um 200 talsins í fyrra og voru mættir til leiks hundar af öllum stærðum og gerðum með eigendum sínum á öllum aldri. Valdimar Gunnarsson sagði okkur betur af þessu.