Morgunútvarpið

Bjarni Ben,Donald Trump,nýjar reglur á HM og bændur uggandi vegna innbrota

Brotist var inn í Reykjabúið í Mosfellsbæ aðfaranótt mánudags og fuglar bornir út sem síðar þurfti að aflífa. Bréf sem skilið var eftir á staðnum gaf í skyn að verknaðurinn tengdist dýravelferð. Þá var brotist inn í svínabú Stjörnugríss á Kjalarnesi í maí og skemmdir unnar á skrifstofu og svínahúsum búsins með þeim afleiðingum að dýr gengu laus og sum drápust. Þetta er nýr veruleiki sem bændur í þessum iðnaði búa við og Margrét Ágústa Sigurðardóttir framkvæmdastjóri Bændasamtakanna kom til okkar og ræddi þetta.

Donald Trump ætlar að hætta við stofnun sjóðs sem átti að greiða bætur til fólks sem réðist á þinghús Bandaríkjanna 6. janúar 2021, til að koma í veg fyrir formlega staðfestingu úrslita forsetakosninganna 2020. Stofnun sjóðsins hafði verið harðlega gagnrýnd af bæði Demókrötum og Repúblikönum og þá meðal annars á þeim grundvelli að með honum vildi Trump gefa bandamönnum sínum peninga skattgreiðenda. Dómstólar hafa undanfarið komið í veg fyrir að ýmsar hugmyndir Trump raungerist og Þorgils Jónsson fréttamaður fræddi okkur um það.

Bjarni Benediktsson, framkvæmdastjóri Samtaka atvinnulífsins, ferðast nú um landið og tekur stöðuna á fyrirtækjum, ræðir lausnir á efnahagsmálum og stöðuna í kjarasamningum. Í dag er hann staddur á Akureyri og við fengum hann í hljóðstofu RÚV þar sem við ræddum við hann stöðuna.

Þorkell Gunnar Sigurbjörnsson kom til okkar vopnaður nýjum reglum í knattspyrnu sem munu taka gildi á HM.