Morgunútvarpið

Símafrí í skólum, 30 hunda heimili, nýtt viðburðahús í Garðabæ, pólitíkin í Reykjavík og Danska konan

Í gær sagði Pawel Bartoszek, þingmaður Viðreisnar, frá dapri niðurstöðu símabanns úr ónefndri unglingadeild í grunnskóla á Facebook-síðu sinni. Sagði hann krakkana nota hverja lausa stund til að fara af skólalóð til að komast á netið og að gangar standi tómir ásamt félagsmiðstöðvum. Nokkrir gripu til varna fyrir símabannið og Morgunútvarpið hóaði í Ómar Örn Magnússon, skólastjóra Hagaskóla, til að segja okkur hvernig símabannið gengur þar og víðar.

Hjónin María Björk Guðmundsdóttir og Gunnar Eyfjörð Ómarsson eru með 30 husky hunda. Á nóttunni skipta þau hundum í tvo hópa. Yngri hópurinn sefur á ákveðnum stað og eldri á öðrum. Fjórir elstu hundarnir fá að sofa inni svefnherbergi hjá þeim. En hvernig er annars venjulegur dagur á þessu óvenjulega heimili? Við slóum á þráðinn norður og heyrðum í Maríu Björk.

Um þessar mundir eru 50 ár liðin frá því að bæjarstjórn Garðabæjar fundaði í fyrsta skipti. Í tilefni af afmælinu var samþykkt að vinna að byggingu samfélags- og viðburðahúss í bænum. Almar Guðmundsson bæjarstjóri sagði okkur betur frá því.

Sveitarstjórnarkosningar fara fram 16. maí og nú styttist í að flokkarnir kynni framboðslista sína. Spennan hefur magnast í Reykjavík undanfarna daga og til að fara yfir málin fengum við til okkar tvo fyrrverandi borgarfulltrúa, þær Katrínu Atladóttur og Kristínu Soffíu Jónsdóttur.

Danska konan hefur komið eins og stormsveipur á dagskrá RÚV. Þættirnir eru bæði skemmtilefgir og óhefðbundnir og þegar maður horfir á þá er eðlilegt að velta fyrir sér hvað er á bakvið þennan magnaða karakter, sem danska konan í túlkun Trine Dyrholm er. Við fengum Ólaf Egilsson, annan af handritshöfundum þáttanna, í spjall til að kafa örlítið undiryfirborðið nú þegar tveir þættir af seríunni hafa verið sýndir.