Framleiðsla RÚV
Íslenskt efni var að venju blanda af efni keyptu af sjálfstæðum framleiðendum og eigin framleiðslu. Framboðið var fjölbreytt og áhersla lögð á aukið aðgengi að efni í spilara.
Söngvakeppnin
Lögin í Söngvakeppninni kynnt í byrjun árs. Undankeppnin var í tvennu lagi, bæði kvöldin fyrir fullu húsi. Fimm lög öttu kappi í úrslitunum og bræðurnir í VÆB fóru með sigur af hólmi með lagið Róa og voru því framlag Íslands í Eurovision í Sviss í maí. Þeir voru fyrstir á svið á undanúrslitakvöldinu, komust í úrslitin og höfnuðu í 25. sæti.
Í þáttunum Alla leið var farið yfir öll lögin í Eurovision og reynt að spá fyrir um gengi þeirra. Sýnt var frá ferðalagi íslenska hópsins og undirbúningi VÆB-bræðra og föruneytis þeirra í Póstkorti frá Basel.
Viðburðir og bein útsending
Fjölmargir tónlistarviðburðir voru í beinni útsendingu eða teknir upp, til dæmis Sjónvarpstónleikar Sinfó, Klassíkin okkar, Tónaflóð, Músíktilraunir, Söngkeppni framhaldsskólanna, Jülevenner Emmsjé Gauta, Jólagestir, Skálmöld í Heimskautagerðinu, Aldrei fór ég suður og Bræðslan.
Þeir viðburðir sem árlega er sýnt frá eru Íslensku bókmenntaverðlaunin, Gríman, Eddan, Íslensku menntaverðlaunin og Íslensku tónlistarverðlaunin. Á UngRÚV voru það Skrekkur, Skólahreysti, Söngkeppni Samfés, Sögur verðlaunahátíð barnanna og fleira.
Safnað var fyrir nýju kvennaathvarfi í Á allra vörum í byrjun apríl. Landsmenn fengu innsýn í starf athvarfsins og sagðar voru reynslusögur kvenna og barna sem þar hafa dvalist.
Uppistandið Ferðabók Gísla Einarssonar og 11 spor: Til hamingju! með lífskúnstnernum Frímanni Gunnarssyni voru sýnd á vormánuðum.
Lokapunktur í dagskrá ársins var svo Áramótaskaupið í leikstjórn Allans Sigurðssonar og Hannesar Þórs Arasonar.
Íslenskar heimildarmyndir
Fjölmargar innlendar og erlendar heimildarmyndir voru sýndar á árinu, til dæmis Dagurinn sem Ísland stöðvaðist, Fuglalíf, Trúnó í sánunni, Sjálfsvörn, Hinn stóri samhljómur sandsins, Jarðsetning, Riða og Strengur. Sýningin Fyrir allra augum markaði tímamót því þetta var í fyrsta sinn sem RÚV sýnir efni með sjónlýsingu. Tónlistartengdar heimildarmyndir voru til dæmis Purrkur Pillnikk, Ármenn áttunnar, Ellen og Goth í Reykjavík.
Erlent heimildaefni
Heimildarefni frá BBC á alltaf sinn sess í dagskránni og vinsældir Davids Attenborough eru alltaf jafn miklar. Þáttaröðin Ísalög (Frozen Planet 2) var sýnd á RÚV með íslenskri talsetningu og á sama tíma á RÚV 2 á ensku. Sýndar voru ýmsar heimildarmyndir sem hafa verið sýndar á heimildamyndahátíðum víða um heim, þar á meðal Nýjar óbyggðir (New Kind of Wilderness), Aðeins himininn yfir okkur (John & Yoko: Above us only Sky) og Tvínýlenduvædd (Twice Colonized). Þá voru á dagskrá þáttaraðir eins og Marilyn Monroe (Reframed: Marily Monroe), Lífshlaup í tíu myndum (Life in Ten Pictures 2), Stríð á norðurslóðum 2 (Untold Artic War 2) og Frida Kahlo í hnotskurn (Becoming Frida Kahlo).
Íslenskar þáttaraðir
Í umræðuþættinum Torginu varpar fólkið í landinu fram spurningum og stendur fyrir máli sínu. Á árinu var meðal annars fjallað um veiðigjöld, aga í grunnskólum og þjóðaröryggi.
Vikan með Gísla Marteini átti tíu ára afmæli á vormánuðum og heldur velli sem einn vinsælasti sjónvarpsþáttur þjóðarinnar. Landinn hélt líka sínum sessi og einnig Kiljan í umsjón Egils Helgasonar.
Fimmtánda þáttaröð hinna margverðlaunuðu þátta Með okkar augum var sýnd á haustmánuðum. Fólk með þroskahömlun vinnur þættina í samstarfi við fagfólk í sjónvarpsgerð.
Í þáttunum Dagur í lífi eru sagðar sögur fólks sem býr við að einhverju leyti við óvenjulegar aðstæður.
Þættirnir Steinsnar frá þjóðvegi hófu göngu sína. Í þeim bregður leikarinn Örn Árnason sér í hlutverk leiðsögumanns og finnur áhugaverða staði í nálægð við þjóðveginn. Hringfarinn hélt líka áfram ferð sinni um heiminn. Á vormánuðum fóru hjónin Kristján og Ásdís Rósa til Japans.
Eva María Jónsdóttir og Pétur Blöndal drógu fram þræði ljóðsins í íslensku samfélagi í þáttunum Ljóðalandi sem vöktu verðskuldaða athygli. Fjallað var um íslenskar sviðslistir í þáttunum Sviðið.
Þættirnir Fílalag sneru aftur í umsjón Snorra Helgasonar og Bergs Ebba. Þeir setja íslensk dægurlög í samhengi við tísku og tíðaranda síns tíma.
Íslensk saga og sagnir voru kannaðar í þáttunum Fyrir alla muni með því að skoða muni sem tengjast sérstökum atburðum.
Í heimildarþáttunum Ímynd var fjallað um íslenska ljósmyndun frá sjónarhorni lista, landslags, samtíma, fréttaflutnings, fortíðar og framtíðar. Í Myndasögum voru rifjaðar upp sögur á bak við áhugaverðar ljósmyndir.
Matarmenning Íslendinga var skoðuð með ýmsum hætti. Í Uppskriftabókinni var fjallað um konur sem hafa áratugareynslu af matargerð og í Matarsögu Íslands var farið í rannsóknarleiðangur og rýnt í matarmenningu frá landnámi til dagsins í dag. Í Veislunni fóru þeir Sverrir Þór Sverrisson og Gunnar Karl Gíslason, Michelin-kokkur, út í hinar ýmsu eyjar út fyrir ströndum Íslands og kynntu sér ólíkar matarhefðir. Í Svepparíkinu voru íslenskir sveppir skoðaðir frá sjónarhorni vísinda, menningar og sjálfbærni.
Fréttatengdi skemmtiþátturinn Er þetta frétt? sneri aftur, sjöunda þáttaröð Kappsmáls leit dagsins ljós og sýnt var beint frá Gettu betur, spurningakeppni framhaldsskólanema, þar sem Menntaskólinn við Hamrahlíð stóð uppi sem sigurvegari eftir spennandi keppni.
Leikið efni
Þættirnir Vigdís, um Vigdísi Finnbogadóttur, voru frumsýndir á nýársdag. Fjallað er um aðdraganda þess að hún bauð sig fram til forseta Íslands. Þá var frumsýnd heimildarmyndin Takk Vigdís þar sem rætt var við samstarfsfólk, vini og kunningja Vigdísar um kosningabaráttuna og forsetatíðina.
Spennuþáttaröðin Kuldi, byggðir á metsölubók Yrsu Sigurðardóttur, var frumsýnd um páskana.
Landsmenn kynntust hjónunum Felix og Klöru í samnefndum sjónvarpsþáttum á haustmánuðum. Þættirnir fjallar um fyrrverandi tollvörðinn Felix sem flyst ásamt eiginkonu sinni, Klöru, í þjónustuíbúð fyrir aldraða. Á meðan Klara nýtur lífsins rankar Felix við sér í innihaldslausum hversdagsleika og leitar tilgangs.
RÚV kaupir sýningarrétt að flestum kvikmyndum sem eru framleiddar á Íslandi. Ljósvíkingar, Þrot, Volaða land og Snerting eru meðal þeirra sem voru sýndar á árinu.
Erlent efni
Erlend dagskrá var með hefðbundnu sniði og áherslur þær sömu og síðustu ár í bæði heimilda- og leiknu efni.
Samstarf og samframleiðsla RÚV og norrænu ríkissjónvarpsstöðvanna í N12 er sterkara en nokkru sinni fyrr og samstarf við norðurevrópskar ríkissjónvarpsstöðvar, New8, í Þýsklandi, Hollandi og Belgíu hefur gefið af sér hágæða leikið efni.
Breskt leikið efni var sem fyrr fyrirferðarmikið, til dæmis Bates gegn póstþjónustunni (Mr. Bates vs the Postoffice), sem er sannsöguleg sería um eitt stærsta réttarfarshneyksli í sögu Bretlands. Þættirnir urðu til þess að málið var tekið upp að nýju og fólk sem brotið var á fékk bætur.
Fjórða og síðasta þáttaröð í sagnabálknum Framúrskarandi vinkona (My Brilliant Friend) var á dagskrá og fyrri þáttaraðirnar voru aðgengilegar í spilara. Áhorfendur sækja í sífellt auknum mæli erlent leikið efni í spilarann í stað þess að horfa á það í línulegri dagskrá.
Spennuþættir sem byggast á skáldsögum verða sífellt vinsælli og sýndir voru Félagarnir fimm (The Famous Five) sem eru byggðir á skáldsögum Enid Blyton, Karen Pirie, Síðasta afmælið (The Last Anniversary), Dalgliesh og Grace. Vinsælir kunningjar áttu sinn fasta stað, til dæmis Séra Brown, Ljósmóðirin og þriðja sería af Bláu ljósunum í Belfast (Blue Lights).
Frumsýndar voru tvær úkraínskar spennuþáttaraðir á árinu, Þögnin rofin (Sutnja) og Þau sem fóru ekki (Those Who Stayed); og tvær pólskar spennuþáttaraðir, Kennarinn 3 (Belfer) og Myrkir englar (Czarne Stokrotki).
Kvikmyndir
Kvikmyndir eiga fastan sess í dagskránni. Gerður var samningur við Disney um sýningar á stærstu og vinsælustu teiknimyndum síðari ára sem talsettar hafa verið á íslensku, kvikmyndum á borð við Frosinn (Frozen), Konung ljónanna (Lion King) og Leikfangasögu (Toy Story).
Nóvember var tileinkaður klassískum stórmyndum sem voru sýndar á sunnudagskvöldum: Þriðji maðurinn (The Third Man), Járnkrossinn (Cross of Iron), Fílamaðurinn (Elephant Man) og Villur vegar (Don‘t Look Now).
Framleiðsla Rásar 1
Rás 1 hefur mikilvægu hlutverki að gegna í íslensku fjölmiðlaumhverfi. Dagskrá rásarinnar ber þess enn merki að hafa lengi verið eina íslenska útvarpsstöðin. Markmiðið er að stuðla að menningarþróun þjóðarinnar; miðla fjölbreyttu efni um það sem hæst ber í íslenskri menningu hverju sinni. Það er gert með fjölbreyttu efni, allt frá barnaefni til frétta- og fréttaskýringaþátta, með umfjöllun um samfélagsmál, listir, stjórnmál, umhverfismál, tækni, vísindi og trúarbrögð og miðlun menningararfs í safni Ríkisútvarpsins.
Fjölbreytni
Fjölbreytt dagskrá var að venju á Rás 1. Boðið var upp á fjölda nýrra þátta í bland við rótgróna ástsæla dagskrárliði.
Vinna við dagskrárstefnu rásarinnar hélt áfram og stefnt að því að ljúka henni á árinu. Greiningarvinna stóð yfir allt árið 2025 og heldur áfram.
Síðari hluti ársins fór í umfangsmikla vinnu við breytingar á daglegri dagskrá sem þegar hefur litið dagsins ljós.
Útvarpsleikhúsið
Þrjú verk komu frá Útvarpsleikhúsinu. Um páskana var frumflutt Sorrí hvað ég svara seint, verk í sex hlutum eftir Bergdísi Júlíu Jóhannsdóttur og Arnar Hauksson. Það fjallar um systkinin Fanneyju og Berg. Unnið er með hljóðskilaboð sem samskiptamáta í dramatísku verki um vináttu, fjölskyldubönd og úrvinnslu áfalla.
Heimildarverkið Ertu hér? eftir Ásrúnu Magnúsdóttur og Höllu Þórlaugu Óskarsdóttur byggist á samnefndu verki sem sýnt var í Borgarleikhússins á tímum heimsfaraldurs og fjallar um vináttu kvenna en Ásrún og Halla hafa verið vinkonur frá barnsaldri. Um jólin bauð Útvarpsleikhúsið upp á heimildarleikverkið Er ekki allt í lagi heima hjá þér? eftir Evu Rún Snorradóttur. Það byggist á viðtölum við fólk sem á það sameiginlegt að hafa alist upp hjá móður með geðsjúkdóm. Eva Rún beitti nýstárlegri aðferð við gerð verksins og klippti saman hljóðbrot úr viðtölunum sem hópurinn flutti svo eins og leikrit.
Prix Europa
Leikritið Þau sjá okkur ekki í myrkrinu, sem flutt var um jólin 2024 á Rás 1, var tilnefnt til evrópsku ljósvakaverðlaunanna Prix Europa í flokki skáldaðra útvarpsverka. Verkið byggir Kristín Eiríksdóttir á viðtölum við Ahmed Almamlouk og Fadiu Redwan sem flúðu hingað til lands frá Gaza. Afraksturinn var tveir einleikir sem Hilmar Guðjónsson og Ilmur Kristjánsdóttir fluttu. Verkinu var vel tekið á Prix Europa og vakti mikla athygli.
Hlaðvarpsritstjórn
Ólínuleg miðlun hljóðvarps heldur áfram að festa sig í sessi sem hluti af kjarnastarfsemi RÚV. Hlaðvarpsritstjórn vann sem fyrr bæði með verktökum og dagskrárgerðarmönnum í húsi að fjölmörgun þáttum fyrir hlaðvarp. Nær allt ólínulegt hljóðvarpsefni er líka sent út í línulegri útvarpsdagskrá.
Hvar er Jón?
Stærsta hlaðvarpsútgáfa ársins var samvinnuverkefni RÚV og írska ríkisútvarpsins RTÉ: Hvar er Jón?/Where is Jón? Þættirnir voru framleiddir á íslensku og ensku fyrir spilara og hlaðvarpsveitur. Ætla má að engir íslenskir hljóðvarpsþættir hafi ratað til jafn margra, enda höfðu þeir verið spilaðir um 1,5 milljón sinnum í lok árs 2025. Hvar er Jón?/Where is Jón? fékk níu tilnefningar til evrópskra og alþjóðlegra verðlauna. Þættirnir leiddu til þess að lögreglurannsókn á máli Jóns hófst fyrir alvöru, sex árum eftir að hann hvarf í Dyflinni.
Þáttaröð Lestarinnar, Konungsinnar í Kísildal, var meðal hápunkta ársins í hlaðvarpsútgáfu. Þættirnir hlutu tilnefningu til Blaðmannaverðlauna fyrir umfjöllun ársins. Einnig má nefna þættina Aftur til Egyptalands í umsjón Mörtu Goðadóttur. Sögur frá afskekktum byggðum römmuðu inn starfsárið í þáttum um Flatey og Sölvadal og Guðrún Hálfdánardóttir hélt áfram að fjalla um menntamál í tveimur þáttaröðum sem nú bera yfirheitið Kerfið. Enn eru margir vinsælir þættir enn ótaldir en sá vinsælasti var líklega Glæpir í gömlum húsum.
Spilari RÚV
Margir fastir liðir í útvarpi ganga margir vel í ólínulegri hlustun á hlaðvarpsveitum. Mest var hlustað á Í ljósi sögunnar, Frjálsar hendur og Þetta helst; og Þjóðsögukistan bættist á listann á árinu. Ljóst er að bæði foreldrar og börn vilja hlusta á gæðaefni í ólínulegri dagskrá í spilara og hlaðvarpsveitum, og fjöldi notenda spilar sömu þættina jafnvel aftur og aftur.
Langflestir hlustendur útvarps í ólínulegri dagskrá nota spilara RÚV í vef og appi. Hlustendahópurinn á hlaðvarpsveitum s.s. Spotify og Apple Podcasts fer einnig ört vaxandi.
Tónlist á Rás 1
Tónlistardagskráin dró sem fyrr upp fjölbreytta mynd af íslensku tónlistarlífi.
Bein útsending og hljóðritun á áhugaverðu efni einkenndi dagskrána með tónlist frá öllum mögulegum tímabilum tónlistarsögunnar í flutningi fyrsta flokks tónlistarmanna.
Sinfóníuhljómsveit Íslands, Stórsveit Reykjavíkur, tónlistarhátíðirnar Myrkir Músíkdagar, Reykjavik Early Music Festival, Sumartónleikar í Skálholti, tónleikaröðin Tíbrá í Salnum, þjóðlagahátíð á Siglufirði, tónlstarhátíðin Við Djúpið, Djasshátíð Reykjavíkur, Sönghátíð í Hafnarborg og fleiri komu við sögu auk fjölmargra stakra viðburða ljóðasöngs og hljóðfæratónlistar. Auk þessa er reglulega útvarpað því besta af tónleikasviðum Evrópu á tónleikakvöldum.
Tónlistardagskrá Rásar 1
Sígild tónlist ómaði í bland við tónlist úr samtímanum, með áherslu á íslenska tónlist og íslenska flytjendur. Fastar tónlistarlínur eru frá 10:15-11 og síðdegis frá 14-15. Alla daga vikunnar ratar einnig tónlist inn í fasta og tilfallandi þætti. Leikin er tónlist úr heimi dægurlaga, þjóðlaga, djasstónlistar og víðar.
Tónleikahaldi var gefinn gaumur og útgáfum og ýmsu öðru í daglegu lífi listafólks. Vikuleg umfjöllun um sígilda tónlist er til dæmis á Morgunvaktinni á Rás 1.
Rás 1 vinnur að kerfisbreytingum í dagskrársetningu tónlistar sem vonandi eykur fjölbreytni tónlistar enn frekar. Dagskrárgerðarfólk í tónlist heldur áfram að uppfylla fyrirheitin í nýbirtri tónlistarstefnu Ríkisútvarpsins.
Jólalag Ríkisútvarpsins
Pantað var nýtt jólalag Ríkisútvarpsins, Kerling heitir Grýla, eftir Hreiðar Inga Þorsteinsson og flutt var nýtt hljóðrit barokktónlistar í dagskrárliðnum Húmar að jólum, sem hljómar fram að kirkjuklukkum sem hringja inn jólin á aðfangadagskvöld.
Hlutverk
Hlutverk Rásar 2 er miðlun á íslenskri tónlist. Útvarpsþátturinn Rokkland fagnaði 30 ára afmæli með stórtónleikum í Hofi á Akureyri ásamt Sinfóníuhljómsveit Norðurlands á mögnuðum tónleikum í upphafi árs. Samstarf Ólátagarðs og Hörpu var gjöfult, með upptökum úr Upprásinni þar sem ungum hljómsveitum og listafólki gefst tækifæri til að halda tónleika í Hörpu. Rás 2 hefur hljóðritað þessa tónleikaröð og útvarpað.
Fyrst og fremst í íslenskri tónlist
Rás 2 er leiðandi í fjölbreyttri tónlist og kynni alls konar strauma og stefnur fyrir hlustendum. Stöðin kynnir fyrst og fremst nýja íslenska tónlist.
Samkvæmt nýrri tónlistarstefnu RÚV eiga að lágmarki 40% tónlistar á Rás 2 að vera íslensk. Þegar 100 mest spiluðu lög ársins eru skoðuð er hlutfall íslenskrar og erlendar tónlistar jafnt, auk þess sem hlutföll kynja voru jöfn, sem einnig er kveðið á um í stefnunni.
Plata vikunnar skipaði stórt hlutverk í dagskránni. Fimmtíu nýjar íslenskar plötur voru teknar fyrir og kynntar með þætti um hverja plötu, innslögum í dagskrá og plötudómi.
Þá voru yfir 800 ný íslensk lög kynnt á árinu, í Undiröldunni, Ólátagarði og öðrum tónlistarþáttum.
Spilaðir voru 14.539 einstakir titlar, það er að segja lög sem eru spiluð að minnsta kosti einu sinni á árinu. Til samanburðar voru spilaðir 3.055 einstakir titlar á Bylgjunni, 4.715 á X-inu, og 1.572 á FM957. Það má því segja að Rás 2 sinni hlutverki sínu að bjóða upp á öðruvísi og dýpra tónlistarútvarp en aðrar stöðvar á íslenskum útvarpsmarkaði.
Sumarið
Gerðar voru töluverðar breytingar á sumardagskrá Rásar 2. Vera Illugadóttir og Helgi Seljan ásamt Kristjáni Frey sáu um samtengt morgunútvarp á Rás 1 og 2. Félagsheimilið í umsjón Friðriks Ómars Hjörleifssonar var eftir hádegi alla sunnudaga og naut mikilla vinsælda.
Aðrir sumarþættir sem nutu vinsælda voru þættir Vignis Egils Vigfússonar um Þjóðhátíð í Eyjum og saga tónlistarhátíðarinnar Uxa í umsjón Viktoríu Blöndal.
Viðburðir
Rás 2 sendi út frá tónlistarhátíðunum Aldrei fór ég suður á Ísafirði, Bræðslunni á Borgarfirði eystra, Mannfólkinu sem breytist í slím á Akureyri, Upprásinni og Iceland Airwaves í Reykjavík. Fjallað var um alþjóðlegu tónlistarhátíðina Eurosonic, Söngvakeppnina, Eurovision og Músíktilraunir. Þá eru ótaldir allir þeir tónleikar sem Rás 2 tók upp á árinu en vikulega eru spilaðar tónleikaupptökur í þættinum Konsert. Upptökunum er líka dreift til annarra ríkisstöðva í Evrópu í gegnum samstarfsvettvang EBU.
Rás 2 tók þátt í alþjóðlegum útvarpsþættinum Europe’s Biggest Gigg á vegum BBC Radio 1 þar sem íslensk tónlist var kynnt í beinni útsendingu á ríkisútvarpsstöðvum um alla Evrópu. Tónlistarkonan Elín Hall var fulltrúi Rásar 2 í þættinum. BBC stóð aftur að þessum þætti í mars 2026 og Rás 2 tók þátt.
Nýsköpun
Rás 2 stóð fyrir árlegri jólalagakeppni til að styðja við nýsköpun í tónlist og yfir 60 ný íslensk jólalög voru send inn. Auk þess voru tónleikaupptökur sendar út í þættinum Konsert á fimmtudagskvöldum og þeim dreift til annarra ríkisstöðva í Evrópu í gegnum samstarfsvettvang Sambands evrópskra útvarpsstöðva, EBU.
Almannavarnahlutverk
Fréttaflutningur er á klukkutíma fresti og reglulega er umfjöllun um fréttir og dægurmál í ýmsum þáttum. Rás 2 er mikilvægur þáttur í almannavarnahlutverki RÚV einkum með nánu og góðu samstarfi við fréttastofu þegar mikið liggur við.
Dagskrá var ítrekað rofin á árinu með beinum fréttaútsendingum um eldsumbrot á Reykjanesskaga. Við þær aðstæður er helstu fréttum og mikilvægum upplýsingum miðlað til þjóðarinnar. Hlustunartölur benda til þess að stór hluti þjóðarinnar treysti á Rás 2 til þess að fá nýjustu upplýsingar.
Dagskrá er einnig rofin í tengslum við stóra blaðamannafundi og fyrstu viðbrögð við stórum tíðindum.
Fyrir alþingiskosningar voru sendir út kosningaþættir og reglulega var leitað eftir viðbrögðum almennings um málefni liðandi stundar.
Í fréttum er þetta helst
Fréttastofa RÚV starfar allan sólarhringinn, allan ársins hring. Fréttamenn eru með starfsstöðvar í Efstaleiti, á Akureyri, Egilsstöðum, í Borgarnesi og Brussel. Undir fréttastofuna heyra fréttatímar í útvarpi og sjónvarpi, fréttaskýringaþættir, umræðuþættir og fréttaþjónusta á netinu og samfélagsmiðlum, og líka RÚV English, RÚV Polski, fréttir á auðskildu máli og veðurfréttaþjónusta. Önnur stór verkefni eru til að mynda fréttaannálar í útvarpi og sjónvarpi, útsending frá stefnuræðu forsætisráðherra og umræðum um hana, útsending frá eldhúsdagsumræðum á Alþingi og umfjöllun í aðdraganda kosninga.
Stórt fréttaár
Árið var rólegra en árið þar á undan enda engar innlendar kosningar og mun færri eldgos á Reykjanesskaga. Ýmis stór fréttamál vöktu mikla athygli, til dæmis umfjöllun Kveiks um PPP-skjölin, gagnasafn fyrirtækisins PPP sem tók að sér meðal annars að sér að njósna fyrir auðuga viðskiptavini og hafði í sínum fórum trúnaðarupplýsingar úr rannsóknargögnum lögreglu. Fjallað var um fortíð barna- og menntamálaráðherra og tilraun til að hafa upp á og ræða við manneskju sem benti forsætisráðuneytinu á þá fortíð. Ráðherra sagði af sér í aðdraganda þeirrar umfjöllunar. Annað stórt mál var umfjöllun Spegilsins um viðskipti embættis ríkislögreglustjóra við fyrirtækið Intra ráðgjöf. Ríkislögreglustjóri lét af embætti í framhaldi af þeim fréttaflutningi.
Fréttastofan sinnti öflugum fréttaflutningi á erlendum vettvangi. Fréttateymi fóru víða og öfluðu frétta meðal annars frá Kína, þar sem forseti Íslands var í opinberri heimsókn, frá Úkraínu, Grænlandi og Noregi þar sem kosið var til þings.
Nýjungar á fréttastofunni
Umfangsmiklum breytingum var hrint í framkvæmd á árinu. Sjónvarpsfréttir voru færðar til klukkan 21 meðan á EM kvenna í fótbolta var í júlí enda skaraðist útsendingartími leikja gjarnan við útsendingartíma frétta. Þegar fréttir færðust svo aftur á sinni rétta tíma klukkan 19 að mótinu loknu fóru seinni fréttir sjónvarps ekki aftur á dagskrá. Síðasti tíufréttatíminn í sjónvarpi var 1. júlí.
Í byrjun september tóku umfangsmiklar skipulagsbreytingar gildi. Þær miðuðust við að nýta það svigrúm sem varð til með niðurfellingu tíufrétta í sjónvarpi til að styrkja fréttaþjónustu á vef og samfélagsmiðlum. Vinnulag flestra starfsmanna tók breytingum og verkaskipting í mörgum tilfellum. Með þessu tókst að efla mjög fréttavinnslu fyrir vef, auka framboð og bæta viðbragð. Þar að auki voru gerðar breytingar til að bæta framsetningu efnis á vef.
Gerðar voru breytingar á framsetningu efnis í sjónvarpsfréttum. Meiri áhersla er lögð á hlutverk þular sem tekur bæði lifandi viðtöl og leiðir áhorfendur í gegnum fréttaskýringar með grafík í bakgrunni. Þá er lögð áhersla á að koma fleiri sjónarmiðum en áður að í sömu fréttamálum. Nýtt útlit sjónvarpsfrétta og nýtt fréttastef voru tekin í notkun í desember.
Nokkrar breytingar urðu á ritstjórn einstaka eininga fréttastofunnar. Ólöf Rún Erlendsdóttir tók við af Ágústi Ólafssyni sem ritstjóri landsbyggðafrétta; Ragnhildur Þrastardóttir tók við af Ingólfi Bjarna Sigfússyni sem ritstjóri Kveiks; og Sigríður Halldórsdóttir tók við af Baldvin Þór Bergssyni sem ritstjóri Kastljóss.
Traust og aukið áhorf
Traust er öllum fjölmiðlum nauðsynlegt en það er hvorki sjálfgefið né sjálfsagt. Í könnun sem var gerð í maí 2025 sögðust 68% bera mikið traust til fréttastofu RÚV og traustið var áberandi mikið meðal yngstu aldurshópanna. Í desember var traust til allra fjölmiðla kannað og þar mældist fréttastofa RÚV með mikið traust hjá 65% sem er umtalsvert hærra hlutfall en sagðist treysta öðrum fjölmiðlum. Þessu trausti þarf að viðhalda með faglegum og góðum vinnubrögðum alla daga ársins. Það vekur hins vegar áhyggjur að það dregur úr trausti til allra stærstu fjölmiðla landsins.
Fréttastofa fékk viðurkenningar fyrir vel unnin störf. Freyr Gígja Gunnarsson, fréttamaður í Speglinum, fékk Blaðamannaverðlaun ársins og Eva Björk Benediktsdóttir fékk verðlaun fyrir viðtal ársins. Íslensku sjónvarpsverðlaunin voru afhent í fyrsta sinn á árinu. Fréttastofa RÚV hlaut verðlaun fyrir sjónvarpsviðburð ársins, kosningavöku vegna alþingiskosninganna í nóvember 2024.
Þegar á reynir leitar þjóðin til fréttastofu RÚV og það sést glöggt á niðurstöðum áhorfs- og hlustunarmælinga. Meðaláhorf á sjónvarpsfréttir var um 24% á árinu samanborið við 25,9% árið 2024. Mest áhorf var á sjónvarpsfréttatímann 28. apríl 2025 en þá las Bogi Ágústsson fréttir í síðasta sinn. Meðaláhorf á fréttir kl. 22 var um 13%. Meðalhlustun á hádegisfréttir RÚV var 8,6%. Meðalhlustun á Spegilinn var 4,8%.
Íþróttadeild RÚV
Íþróttir sameina þjóðina og RÚV varðveitir íþróttasöguna. Fjallað er um fjölbreyttar íþróttagreinar, allar mögulegar hliðar á íslensku íþróttalífi og hvatt er til aukinnar íþróttaiðkunar. Íslensku afreksfólki er fylgt eftir og áhersla er lögð á að fjalla um íþróttaiðkun allra kynja og ólíkra hópa.
Sýndarsvið
RÚV hélt áfram að þróa sýndarsvið (e. virtual reality studio) í umgjörð leikja, þar sem grafík er notuð í útskýringar og greiningar. Þessi nýja tækni felur í sér ótal möguleika sem gjörbyltir umfjöllun fyrir og eftir leiki.
Landsliðin okkar
Íslenskt íþróttafólk var í eldlínunni á árinu en fjögur íslensk landslið tryggðu sér sæti á lokamóti Evrópumóts og heimsmeistaramóts. RÚV tryggði sér sýningarréttinn á fjórum mótum þar sem Ísland var meðal þátttökuþjóða: EM kvenna í fótbolta, EM karla í körfubolta og HM karla og kvenna í handbolta.
Stofan
Stofan var á sínum stað og fjallaði um alla leiki Íslands en auk þess fangaði íþróttadeild RÚV stemningu hjá íþróttafólki og íslenskum áhorfendum erlendis. Landsliðin okkar voru vinsæl hjá þjóðinni og röðuðu sér í efstu sætin á lista yfir vinsælasta sjónvarpsefni ársins.
Stórmót, Íslandsmót, bikarúrslit, Skólahreysti og aðrir viðburðir
RÚV hélt áfram að sýna frá Íslandsmótum og bikarúrslitum í hinum ýmsu íþróttagreinum, til dæmis handbolta, fótbolta, körfubolta, fimleikum, frjálsíþróttum, sundi, dansi, hestaíþróttum, golfi, blaki og Skólahreysti. Sýnt var frá EM í lyftingum þar sem Eygló Fanndal Sturludóttir varð Evrópumeistari í ólympískum lyftingum og sýndir voru báðir leikir karlaliðs Vals í Evrópukeppninni í handbolta þegar Valur tryggði sér Evrópubikarinn.
Ungt fólk og samfélagsmiðlar
Íþróttadeildin hefur fjallað um hinar ýmsu hliðar íþrótta á samfélagsmiðlum og hefur notkun RÚV íþrótta á þeim miðlum stóraukist sem leiðir af sér aukinn áhuga ungmenna á íþróttum og íþróttaiðkun.
KrakkaRÚV
Í tíu ár hefur KrakkaRÚV boðið upp á fjölbreytt efni fyrir krakka á öllum aldri með áherslu á þjónustu við börn á aldrinum 0-12 ára. Þjónustan er þríþætt, vefurinn KrakkaRÚV.is, línuleg dagskrá og spilari. Þjónustan var efld til muna á árinu þegar flipanum KrakkaRÚV var bætt inn í RÚV-appið. Með þessari breytingu er hægt að stilla á KrakkaRÚV-viðmót í sjónvarpi og börn geta séð allt efni sem er í boði, ekki einungis það sem dregið hefur verið fram á spilara.
KrakkaRÚV okkar allra
Framleiddir eru fimm nýir þættir á viku að staðaldri. Áhersla er á að efni sem er framleitt endurspegli fjölbreytt íslenskt samfélag. KrakkaRÚV vill vera sameinandi afl með það að leiðarljósi að koma alltaf fram af virðingu.
Áhersla er á að miðla fjölbreyttu efni sem nær til breiðs hóp barna. Þjónusta við þau allra yngstu var þróuð áfram með áherslu á sérlega vandað efni á íslensku. Auk þess var mikið um nýtt íslenskt teiknimyndaefni, til dæmis Skrímslin, Tulipop: Vetrarsaga, Flögri og fróðleiksmolarnir og Ormhildarsaga.
Krakkafréttir
Krakkafréttir eru á dagskrá fjóra daga vikunnar, mánudag til fimmtudags. Þar eru fluttar skýrar og hnitmiðaðar fréttir af því helsta sem gerist í íslensku samfélagi og úti í heimi.
Viðfangsefni Krakkafrétta eru fjölbreytt þar sem má meðal annars finna fréttir af stjórnmálum, íþróttum, listum og menningu en einnig er lögð mikil áhersla á að flytja fréttir af krökkum. Til dæmis með því að segja frá viðburðum og starfi sem tengjast krökkum en einnig þeim krökkum sem gera garðinn frægan.
Ari Páll Karlsson er ritstjóri Krakkafrétta. Um vorið skiptist lestur þáttanna á milli Ara Páls, Emblu Bachmann, Gunnars Hrafns Kristjánssonar, Kolbrúnar Maríu Másdóttur og Vilhjálms Haukssonar. Um haustið fækkaði í lesarahópnum og tímunum var skipt á milli Ara, Emblu og Gunnars. Guðrún Adda Björnsdóttir er klippari Krakkafrétta. Krakkafréttir eru sendar út táknmálstúlkaðar á aðalrás en birtast einnig án táknmálstúlkunar á spilaranum.
Um haustið varð til nýr dagskráliður: Köfum dýpra. Hann gengur út á að kynna tiltekið fyrirbæri vel fyrir krökkum, í lengri þætti sem er tekinn upp annars staðar en í fréttastúdíóinu. Í október var fjallað um Kvennafrídaginn og í nóvember um dag íslenskrar tungu.
Einnig hefur teymið unnið náið með kynningardeildinni og klippt brot úr þáttunum sem birtast á samfélagsmiðlum. Klippufærslur voru líka birtar á vef RÚV.
Stundin okkar
Stundin okkar – Tökum á Loft hóf göngu sína haustið 2024 og segir frá ævintýraverunni Loft sem svífur um heiminn í galdraloftbelg ásamt sjónaukanum sínum, henni Sjón. Saman kynnast þau ævintýrum íslenskra barna í skátabúðum og hinni uppátækjasömu Áróru. Í ár fagnar Stundin okkar 59 ára samfelldri göngu í íslensku sjónvarpi.
Árið 2025 kynntust áhorfendur nýrri veru, Fret – hliðarútgáfu af Loft sem er eigingjarnt, ókurteist og óttast breytingar. Með stuðningi krakkanna lærir Fret smám saman að takast á við óöryggi sitt, sýna samkennd og skilja gildi vináttu og náungakærleika.
Þessi þemu falla vel að stefnu Krakkarúv, sem leggur áherslu á samstöðu, sameiningu og jákvæð samskipti.
Með aðalhlutverk fara Andrés Pétur Þorvaldsson, Elma Rún Kristinsdóttir og Inga Sóllilja Arnarsdóttir. Þættirnir eru skrifaðir af Heklu Egilsdóttur og Ragnari Eyþórssyni.
Réttindi barna:
20. nóvember er alþjóðlegur réttindadagur barna. Keyptur var réttur á þáttunum “Celebrating Childrens Rights” og þeir talsettir ásamt því að sýndir voru þættir framleiddir í samstarfi við Unicef þar sem börn gátu sent inn spurningar um stríð og átök og þeim svarað. Sá þáttur var sýndur í nóvember á réttindadegi barna auk þess sem áhersla var á efni um réttindi barna á spilara KrakkaRÚV.
Jóladagskrá
Jóladagskrá KrakkaRÚV er löngu orðin mikilvægur partur af jólahaldi barnanna í landinu. Það er mikilvægt að KrakkaRÚV sé vettvangur þar sem þau geta horft, fræðst og skemmt sér á meðan þau bíða eftir jólunum. Í dagskránni voru frumsýndar nýjar teiknimyndir og þættir auk þess sem þessar gömlu góðu klassísku myndir og þættir voru á dagskrá líkt og önnur ár. Nýtt frumsýnt efni var t.d. Snæholt (talsett jóladagatal), leiksýningin Hvíta tígrisdýrið, Túlipopp vetrarsaga, Ormhildarsaga, kvikmyndir um Múmínálfana og jólaþættir af Jo Jo og ömmu og sérstakur 30 mín. Blæju þáttur.
Jólastundin
Jólastundin er einn af hornsteinunum í dagskrá RÚV og hefur skipað sérstakan sess í jólahefðum landsmanna í gegnum kynslóðirnar. Til að halda hefðinni lifandi þarf hún að þróast með tímanum. Í ár gerðist Jólastundin í sama heimi og Stundin okkar líkt og í fyrra en þó með sjálfstæðri hliðarsögu sem víkkar heiminn og skapar nýjar tengingar án þess að missa þá hlýju og töfra sem einkenna þáttinn.
Í fimmtugustu og níundu Jólastundinni lagði Leppalúði af stað í leit að jólakettinum sem var týndur. Á ferðalagi sínu hitti hann kunnugleg andlit úr Stundinni okkar, þar á meðal Áróru og Odd, sem lögðu honum lið í leitinni. Grýla og jólasveinn brugðu einnig á leik og Loft og Sjón fylgdust spennt með úr fjarlægð.
Krakkaskaupið
Krakkaskaupið átti 10 ára afmæli í ár eins og KrakkaRÚV. Krakkaskaupið var frumsýnt 30. desember og endursýnt á gamlársdag eins og undanfarin ár. Í tilefni af afmælinu var öllu tjaldað til og Krakkaskaupið hefur aldrei verið metnaðarfyllra og stærra. Ár hvert býðst krökkum að senda inn hugmyndir ýmist í handritum eða myndböndum. Nokkrar þeirra eru valdar til að framleiða eða endurframleiða með réttum tækjum og tólum fyrir sjónvarp. Umsjónarmaður Krakkaskaupsins var Árni Beinteinn Árnason og lokalagið var frumsamið eins og áður og höfundur þess var Íris Rós.
Krakkafréttaannáll
Í lok árs tóku umsjónarmenn Krakkafrétta saman helstu fréttir ársins í Krakkafréttaannál. Hann var sendur út tvisvar, 30. desember og á gamlársdag.
Annálnum var breytt 2024 á þann hátt að hafa söguþráð í kynningunum þar sem umsjónarmenn leystu þrautir til að finna helstu fréttir ársins. Í ár var þeirri þróun haldið áfram. Söguþráðurinn var í stuttu máli þessi:
Annálnum hefur verið stolið á ögurstundu. Krakkafréttateymið þarf að leysa krossgátu um fréttir ársins til að finna út hver stal honum! Finna þau annálinn fyrir áramót?
Til að gera langa sögu stutta stal Kolbrún María Másdóttir, fyrrverandi Krakkafréttakona, annálnum með aðstoð VÆB-bræðra sem síðan sungu lokalagið.
Ari Páll Karlsson, Embla Bachmann og Gunnar Hrafn Kristjánsson flökkuðu á milli staða og rifjuðu upp atburði ársins. Karitas M. Bjarkadóttur brá fyrir en hún hefur umsjón með Krakkaheimskviðum og sagði frá helstu erlendu fréttum ársins í annálnum. Krökkum gafst færi á að senda myndband af sér segja frá því sem þeim fannst standa upp úr á árinu.
Útvarp KrakkaRÚV
Útvarpsþátturinn Hvað ertu að lesa? hófst í janúar 2024. Á haustin er fjallað almennt um barnabækur og á vorin um nýju bækurnar úr jólabókaflóðinu.
Í hverjum þætti segir minnst einn fullorðinn, t.d. höfundur, teiknari, útgefandi eða leikstjóri, og að minnsta kosti eitt barn frá því sem þau hafa verið að lesa. Í lok þáttar er alltaf sagt frá því hvert umfjöllunarefni næsta þáttar er svo krakkar geti lesið bókina eða kynnt sér efnið áður.
Undanfarið ár hefur verið meira um uppbrot í þáttunum. Viðtölum er skipt í 3-5 mínútna búta og tónlist og stuttar kynningar settar á milli til að halda betur athygli hlustenda.
Frá áramótum hefur bókaormur þáttarins, þ.e. barn sem segir frá bók, tekið þátt í leik sem tengist bókinni sem fjallað var um í þættinum. Þetta er frábær leið til að vekja áhuga hlustenda á bókinni og lestri almennt.
Þátturinn var tekinn úr línulegri dagskrá Rásar 1 á árinu og er einungis í spilara og á hlaðvarpsveitum. Krakkarnir sækja frekar þangað og þetta býður upp á frjálslegri tímamörk á þáttum og jafnvel rýmri tíma fyrir skil.
Norrænt samstarf í B15
Með þátttöku í B15 skuldbindur RÚV sig til að leggja fram eina þáttaröð á ári til dreifingar á samstarfsstöðvum annars staðar á Norðurlöndum og fær í staðinn aðgang að fjórtán þáttaröðum frá hinum þátttakendunum. Þetta fyrirkomulag styrkir framboð á alþjóðlegu gæðaefni og eflir norrænt samstarf.
Framlag KrakkaRÚV árið 2025 var þáttaröðin Flögri og fróðleiksmolarnir, þar sem forvitni lundinn Flögri leiðir unga áhorfendur um landið og kynnir fyrir þeim spennandi og áhugaverð fyrirbæri á hverjum stað.
Í gegnum samstarfið komu nokkrar þáttaraðir fyrir UngRÚV-vefinn á þessu ári svo sem Slúður og Tvöföld vandræði sem voru kærkomnar þar sem efni fyrir þennan aldurshóp er oft af skornum skammti. Nú eru í talsetningu þættirnir Høj frá DR, sem vonandi eiga eftir að ná góðum árangri, ásamt þáttaröðinni Fantorangen Verden, sem tengist vinsælum þáttum um Fílsa og er hugsuð fyrir enn yngri börn.
Sögur
Sögur er samstarfsverkefni sjö stofnana sem stuðla að barnamenningu og sköpun á Íslandi. Verkefnið hefur það markmið að efla læsi og áhuga barna á íslenskum sögum og bókum, auk þess að upphefja barnamenningu í landinu.
KrakkaRÚV hvetur börn til að senda inn smásögur, lög og texta, handrit að stuttmyndum og leikritum. Höfundar verkanna sem valin eru taka þátt í skapandi smiðjum undir leiðsögn fagfólks þar sem ævintýrin lifna við. Útkoman birtist á fjölbreyttan hátt, sem rafbækur í samstarfi við Miðstöð menntunar og skólaþjónustu, sem stuttmyndir í framleiðslu KrakkaRÚV, sem lög sem lifna við á tónleikum og sem leikrit á sviði Borgarleikhússins.
Í ár valdi KrakkaRÚV þrjár myndir til framleiðslu. Einhyrningurinn og kanínan er eftir Máney Mist Arnþórsdóttur, Óvæntar fréttir eftir Ástríði Grímu Ásgrímsdóttur og Hvað er í gangi? eftir Elísabetu Söru Kolsöe, Karítas Magnúsdóttur og Hlyn Axel Bjarkason. Leikstjórn og framleiðsla voru í umsjón Rosalie Rutar Sigrúnardóttur og myndirnar voru settar saman í þáttinn Sögufólk framtíðarinnar ásamt efni sem tekið var bak við tjöldin. Þátturinn var sýndur kvöldið fyrir Sögur – verðlaunahátíð barnanna 7. júní.
Stuttmyndirnar voru valdar með stefnu KrakkaRÚV í huga um vísanir í ævintýri í hversdagsleikanum og sameiningu.
Verðlaunahátíðin Sögur
Verðlaunahátíðin Sögur er að venju glæsilegur lokapunktur stóra samstarfsverkefnisins þar sem verk barnanna eru verðlaunuð og börn sjálf fá tækifæri til að veita því menningarefni sem þeim fannst skara fram úr á árinu verðlaun.
Á hátíðinni var flutt tónlist sem börn sömdu og flytjendur voru Klara Elías, Jón Jónsson og Þórdís Björk Þorfinnsdóttir ásamt Skólakór Kársness. Heiðursverðlaun Sagna 2025 hlaut Þórunn Björnsdóttir kórstjóri fyrir ómetanlegt framlag til barnamenningar og tónlistaruppeldis um árabil. Hátíðin var sýnd í beinni útsendingu úr Borgarleikhúsinu.
Nýtt fyrirkomulag, sem ráðgert að verði áfram, var kynnt á hátíðinni, talið var niður í innsendingar næsta árs og innsendingarform á mitt.ruv.is var opnað strax að athöfn lokinni.
Í ár var tekin upp sú nýjung að halda tilnefningarathöfn á litla sviðinu í Borgarleikhúsinu í aðdraganda hátíðarinnar.
Teiknimyndir
KrakkaRÚV hélt áfram að bjóða upp á fjölbreytt og skemmtilegt efni fyrir börn landsins, með áherslu á jafnt kynjahlutfall aðalpersóna og efni sem nær til ólíkra aldurshópa. Þáttaraðirnar voru fræðandi og skemmtilegar með ríka áhersla á gæði og vandaða dagskrárgerð fyrir yngri kynslóðina. Blæja og Hvolpasveitin hafa verið flaggskip KrakkaRÚV undanfarin ár. Blæja naut mikilla vinsælda og hélt áfram að slá áhorfsmet, þriðja þáttaröðin var keypt, talsett og sýnd við góðar undirtektir. Níunda þáttaröðin af Hvolpasveitinni var einnig keypt, talsett og sett í sýningu. Einnig var nýtt íslenskt efni sett á dagskrá, þar á meðal Skrímslin, Flögri og Túlípopp sem fengu góðar viðtökur hjá áhorfendum. Fjólublái fíllinn Fílsi átti einnig gott ár og nýjar þáttaraðir bættust við sem styrktu enn frekar fjölbreytni í dagskránni.
Barnamenningarhátíð
Ungir fréttamenn KrakkaRÚV fjölluðu um Barnamenningarhátíð eins og fyrri ár og hátíðin var send út beint á RÚV.
Þátttaka barna
Árið 2025 einkenndist af markvissri stefnumótun í öryggi og velferð barna sem taka þátt í verkefnum á vegum RÚV. Unnið var að mótun og uppfærslu ítarlegra vinnureglna sem starfsfólk og verktakar starfa eftir auk þess sem verklag um samskipti við forráðamenn vegna atvika var skýrt og styrkt.
Jafnframt var gerð heildstæð áætlun um öryggi og heilbrigði barna sem felur í sér skýra verkferla og ítarlegt áhættumat vegna þátttöku ungmenna í verkefnum RÚV. Taxtar voru uppfærðir og taka nú mið af gildandi kjarasamningum Samtaka atvinnulífsins og VR.
Samstarf og samtal við Vinnueftirlitið var aukið með það að markmiði að tryggja að RÚV sé í fararbroddi þegar kemur að vinnu barna í sjónvarps- og kvikmyndagerð.
Samhliða þessari uppbyggingu fengu börn áfram tækifæri til að sækja um og taka þátt í fjölbreyttum verkefnum á vegum KrakkaRÚV. Umsóknarferlið fer í gegnum mitt.ruv.is.
Verkefni sem stóðu til boða á árinu voru:
Krakkafréttaannáll, Krakkafréttir, Sögur 2025 – leikrit, stuttmyndir, lög og smásögur, Stundin okkar, ungt fréttafólk, Krakkaskaup og bókaklúbbur.
Ungt fréttafólk
Alls 37 sóttu um og 12 voru valin til að flytja fréttir á Barnamenningarhátíð. Þau voru til taks fyrir önnur verkefni eins og Barnaþing í nóvember og efni í Krakkafréttaannálinn í desember.
Krakkaskaupið
Á hverju ári koma inn ótal sketsar frá krökkum sem vilja taka þátt í Krakkaskaupinu. Í ár bárust 70 sendingar. Fjögur atriði voru unnin frekar eða framleidd aftur með framleiðsluteymi Krakkaskaupsins. Að auki var tólf barna hópur í ráðgjafateymi Krakkaskaupsins sem hitti handritshöfunda fjórum sinnum og stakk upp á efni til að fjalla um.
Sögur
Alls bárust 139 stuttmyndahandrit, smásögur, leikhúshandrit, lög og textar í Sögur.
Bókaklúbbur
Alls mættu 33 krakkar á aldrinum 7-14 ára í viðtal fyrir þáttinn á tímabilinu ágúst 2025 til mars 2026. Þau sögðu frá bókum, ritsmiðjum, bókaklúbbum og leiksýningum.
UngRÚV
UngRÚV er miðill ætlaður ungmennum á aldrinum 12–16 ára. Þar er lögð sérstök áhersla á fjölbreytt og vandað dagskrárefni sem bæði er unnið fyrir unglinga og með virkri þátttöku þeirra sjálfra. Boðið er upp á beinar útsendingar frá viðburðum auk efnis sem framleitt er hjá RÚV. UngRÚV er samstarfsverkefni skóla- og frístundasviðs Reykjavíkur og RÚV.
Vika6
Vika6 er alltaf í sjöttu viku hvers árs. Vikan er ætluð að vekja athygli á kynheilbrigði ungs fólks. Verkefnið er á vegum jafnsréttisskóla Reykjavíkurborgar og UngRÚV er samstarfsaðili. Vika6 var með nýju sniði í ár, farið var í dýpra samstarf með lögreglunni sem heppnaðist mjög vel. Tvö myndbönd voru gerð, annað um samþykki og hitt um öryggi á internetinu þar sem UngRÚV og samfélagslögreglan fóru og spjölluðu við ungmenni í Rimaskóla. Myndböndin voru birt í spilara UngRÚV ásamt nýju og eldra efni, innlendu og erlendu.
Skólahreysti
Skólahreysti er árleg keppni grunnskólanema í 8.-10. bekk þar sem lið úr grunnskólum um allt land keppa í fjölbreyttum þrautum sem prófa styrk, þol, kraft og samvinnu. Keppnin var haldin í tuttugasta sinn í ár. RÚV hefur sýnt Skólahreysti í þó nokkur ár. Undankeppnir voru þrjár, ein á Akureyri og tvær í Mosfellsbæ. Í þeim kepptu 92 skólar og 12 þeirra komust í úrslitin sem voru í Mosfellsbæ. Keppandi úr Lágafellsskóla setti Íslandsmet í hreystigreip í annað sinn þetta árið. Mikil stemning var á öllum keppnum og greinilegt að samnemendur mættu til að styðja sitt fólk með miklum látum og söngvum.
Skrekkur
Hæfileikakeppni fyrir grunnskólanemendur í Reykjavík, var haldin með glæsibrag líkt og undanfarin ár. Skrekkur heldur áfram að vaxa og umgjörðin í kringum hann verður sífellt veglegri og faglegri. Í aðdraganda undankeppni fór UngRÚV í alla þátttökuskólana og tók upp kynningarinnslög sem voru sýnd í dómarahléum á undanúrslitakvöldunum. Undanúrslitin voru í fyrsta sinn í beinni útsendingu á RÚV 2. Úrslitakvöldið var sent út í beinni á RÚV. Fyrir úrslitin voru jafnframt tekin upp ný kynningarinnslög í stúdíói A með skólunum sem tryggðu sér sæti í úrslitum. Öll atriði keppninnar voru sett á vef UngRÚV. Bjarney Rós og Hinrik gengu til liðs við UngRÚV og sáu um samfélagsmiðlaumfjöllun á undanúrslitakvöldunum. Þau miðluðu stemningunni baksviðs og tóku viðtöl við þátttakendur. Á úrslitakvöldinu voru þau í sama hlutverki og jafnframt í beinu streymi á TikTok-aðgangi RÚV með framleiðanda þar sem áhorfendur gátu sent spurningar í rauntíma.
Fiðringurinn á Norðurlandi og Skjálftinn á Suðurlandi
Fiðringurinn er hæfileikakeppni unglinga á Norðurlandi og Skjálfti á Suðurlandi. Skrekkur er fyrirmyndin og þessar keppnir eru mikilvægur partur af menningu unga fólksins. Þó svo að þetta séu hæfileikakeppnir er þetta ekki síður vettvangur fyrir raddir þeirra og skoðanir á málefnum líðandi stundar. Skjálfti og Fiðringurinn eru teknir upp og settir í spilara UngRÚV. Skjálfti steig enn stærra skref þar sem ungmennin sáu um dagskrárgerð á samfélagsmiðlum ásamt starfsmanni Skjálfta.
Samfés
RÚV og Samfés, samtök félagsmiðstöðva á Íslandi, hafa verið í frábæru samstarfi síðustu ár og margir viðburðir hafa verið á vegum samtakanna svo sem Danskeppni Samfés, hönnunarkeppnin Stíll, Rímnaflæði og Söngkeppni Samfés. Þeim voru sem fyrr gerð skil á vef, spilara og í sjónvarpi.
Söngkeppni Samfés
Söngkeppni Samfés fór fram í Laugardalshöll í Reykjavík sem hluti af Samfestingnum sem er tveggja daga viðburðir félagsmiðstöðva. Keppnin var senda út í beinni útsendingu á RÚV sem gerir hana að stórum sjónvarpsviðburði fyrir ungt tónlistarfólk frá öllum landshornum. Alls kepptu 29 félagsmiðstöðvar og stigu þar fram fjöldinn af hæfileikaríku ungu fólki sem eiga svo sannarlega framtíðina fyrir sér í sviðsljósinu.
Sýnileiki á öðrum miðlum RÚV
Sýnileiki í ungs fólks í öðrum þáttum RÚV skiptir miklu máli. RÚV þarf að halda áfram að vera þar sem þau eru og tala við þau um málefni sem snúa að þeim og skipta þau máli. Landinn fylgdist meðal annars með uppsetningu og tónleikum Tónhyls, fréttastofan var á Samfésballinu og umsjónarmenn Torgsins eru mjög duglegir að hafa ungt fólk með í umræðunni. Þetta er ekki bara góð leið til að koma á samtali við unga fólkið heldur líka að sýna kjarnaáhorfendahópi RÚV allt það frábæra sem það er að gera.
Aðkeypt efni
Undanfarin ár hefur verið aukin áhersla lögð á kaup á erlendu efni fyrir ungt fólk og svo var einnig í ár. Í gegnum B15-samstarfið hefur RÚV fengið frábæra þætti sem tileinkaðir eru ungu fólki annars staðar af Norðurlöndunum. Þar má nefna þættina Sugarbabe, Limbo 2, Gnist 2 og Kuppel 16 sem fjalla allir um unglinga og eru gerðir fyrir unglinga. Í þeim er tekið á mikilvægum málefnum sem eru unglingum ofarlega í huga svo sem ástir, vináttu, sjálfsmynd, kynhneigðir og framtíðardrauma.