Kynjajafnrétti er hornsteinn í ytra og innra starfi RÚV. Unnið er að félagslegri sjálfbærni með ábyrgri umfjöllun og stefnu um fjölbreytileika, jafnrétti og þátttöku í miðlum og starfsumhverfinu.

RÚV starfar í samræmi við lög um jafna stöðu og jafnan rétt kynjanna nr. 150/2020.

Jafnréttisáætlun RÚV var uppfærð á árinu og staðfest af Jafnréttisstofu til þriggja ára í senn. Áætlunin felur í sér markmið og aðgerðir í jafnréttisstarfi innan RÚV og miðar að því að jafna stöðu kynja en nær einnig yfir jafnrétti óháð kynþætti, þjóðernisuppruna, trú, lífsskoðun, fötlun, starfsgetu, aldri, kynhneigð, kynvitund, kyneinkennum eða kyntjáningu í samræmi við lög nr. 86/2018 um jafna meðferð á vinnumarkaði. Gildandi jafnréttisáætlun tilgreinir aðgerðir sem unnið skal að á gildistímanum, m.a. um starf jafnréttisnefndar. Hlutverk nefndarinnar er að fylgjast með stöðu og þróun jafnréttismála hjá RÚV, framvindu aðgerða sem skilgreindar eru í jafnréttisáætlun og endurskoðun þeirra eftir þörfum. Nefndin, sem er skipuð starfsfólki víðs vegar að úr starfseminni,  fundar reglulega og miðlar upplýsingum um störf sín til útvarpsstjóra og starfsfólks. Hún rýnir í niðurstöður árlegrar vinnustaðargreiningar með tilliti til viðhorfa kynjanna til ýmissa þátta í innra starfi. Jafnréttis- og fjölbreytileikaskimun hefur verið þróuð fyrir einstök verkefni og kappkostað að fræðsludagskrá endurspegli þessar áherslur.

RÚV hefur um árabil safnað gögnum um kynjahlutföll viðmælenda/gesta í útvarpi og sjónvarpi til að tryggja jafnan sýnileika í miðlum. Viðmælendagreiningin nær einnig til búsetu og aldurs. Þessum upplýsingum er miðlað reglulega. Hugað er að jafnræði kynja meðal starfsfólks í fréttum og umsjón þátta í útvarpi og sjónvarpi.

RÚV hefur hlotið árlega vottun á jafnlaunakerfi frá 2019 og unnið er jafnt og þétt að umbótum á kerfinu. Vottunin felur m.a. í sér skuldbindingu um reglubundna greiningu  á kynbundnum launamun. Launaákvarðanir byggjast á málefnalegum forsendum og greiða skal sömu laun fyrir sambærileg og jafnverðmæt störf. Laun taka mið af eðli verkefna, kjarasamningum, kjörum á markaði, ábyrgð, menntun, starfsreynslu, persónulegri hæfni og frammistöðu í starfi. Launastefnan tekur til allra starfa innan RÚV ohf. og RÚV sölu ehf.

RÚV hefur sett starfskjarastefnu með það að markmiði að vera samkeppnishæft um starfsfólk og stjórnendur. Ákvarðanir um laun skulu teknar í samræmi við samþykkt ferli um launaákvarðanir þar sem gætt er að jafnréttissjónarmiðum, ábyrgð og eðli verkefna, kjarasamningum, kjörum á markaði, persónubundnum hæfniþáttum og frammistöðu í starfi.

Heilsa og vellíðan starfsfólks er markvisst höfð í forgrunni og starfsfólki tryggt öruggt og heilbrigt vinnuumhverfi. Sett hefur verið velferðarstefna fjórum meginþáttum er snúa að hreyfingu og næringu, vellíðan og velferð, jákvæðum tengsl og samskiptum, lærdómi og þekkingu. Samið hefur verið við fjölmarga aðila um þjónustu og stuðning s.s. sálfræðiaðstoð, svefnráðgjöf, ADHD og einhverfuráðgjöf, sjúkraþjálfun og næringarráðgjöf. Rík áhersla er lögð á að mæta starfsfólki sem mætir erfiðleikum með stuðningi og sveigjanleika.

Afstaða starfsfólks til fjölmargra þátta í vinnuumhverfinu er mæld í reglulegri vinnustaðargreiningu, niðurstöður kynntar og unnið að umbótum. Einnig er viðbragðsáætlun vegna eineltis, kynferðislegrar og kynbundinnar áreitni og ofbeldis (EKKO) vel kynnt og unnið eftir áætluninni í þeim málum sem upp koma á vinnustaðnum.