Á vef RÚV er hægt að lesa fréttir á auðskildu máli (ruv.is/audskilid). Fréttakerfi RÚV er tengt við gervigreindartól frá Miðeind og með aðstoð gervigreindar er hægt að birta fleiri fréttir á auðskildu máli. Með þessu er aðgengi að fréttum stóraukið fyrir þá sem vilja fréttir á einföldu formi. Þjónustan er ætluð fólki með þroskahömlun en nýtist einnig lesblindu fólki og kemur sér vel fyrir byrjendur og fólk sem er skammt á veg komið í íslenskunámi.

RÚV Orð (ord.ruv.is) er ætlað til sjálfsnáms í íslensku með notkun sjónvarpsefnis RÚV. Lausnin er afrakstur samstarfs við Språkkraft, óhagnaðardrifið sænskt félag sem hefur sérhæft sig í hönnun máltæknilausna. Vefurinn bætir aðgengi allra aldurshópa að fjölbreyttu efni til að læra íslensku.

Sjálfvirk textun með beinum útsendingum á völdum dagskrárliðum jókst á árinu. Hún var þegar komin á aukafréttatíma og kosningaumfjöllun. Með þessu er aðgengi að íslensku efni fyrir alla landsmenn aukið. Verkefnið er fólgið í samþættingu sjálfvirkrar textunar frá máltæknifyrirtækinu Tiro við innri kerfi RÚV. Sjálfvirk textun verður sett á fleiri dagskrárliði til að auka þjónustu við notendur.

Á innri vef RÚV er birt mælaborð sem sýnir samsetningu viðmælenda út frá kyni, aldri og búsetu, bæði fyrir miðla og tiltekna sjónvarps- og útvarpsþætti. RÚV leggur áherslu á að mæla og greina gögn um viðmælendur til að tryggja sem fjölbreyttasta samsetningu þeirra.