RÚV | Ársskýrsla |

Mikil hlustun á hlaðvarpsþætti í spilara RÚV

Kolbrún Vaka Helgadóttir — Sat, 31 Dec 2022 15:09:20 +0000

Árið 2022 voru svo framleiddar nokkrar hlaðvarpsseríur sem slógu í gegn og fengu mikla hlustun í Spilara RÚV. Þeir vinsælustu voru Leitin, Sjándinn á Vesturbrú, Skeggi og Joe Grimson, saga af svikum. Hlustað var tæplega 127 þúsund sinnum á Joe Grimson í spilaranum og rúmlega 100 þúsund sinnum á Skeggja.

Jólalag Ríkisútvarpsins

Kolbrún Vaka Helgadóttir — Sun, 25 Dec 2022 14:07:02 +0000

Jólalag Ríkisútvarpsins hefur fyrir löngu skapað sér sess í jóladagskrá Rásar 1. Jólalagið 2022 er eftir Pál Ragnar Pálsson tónskáld og Tui Hirv og Spilmenn ríkisins frumfluttu það í desember. Tónskáldasjóður Ríkisútvarpsins og STEF styrkir verkefnið.

Breytt fyrirkomulag á Jólastundinni

Kolbrún Vaka Helgadóttir — Sun, 25 Dec 2022 09:07:00 +0000

Breytt fyrirkomulag var á Jólastundinni. Farið var úr spjallþáttarforminu og yfir í leikið efni. Jólastundin var jólaævintýri um feðginin Elísu og Egill (Margrét Rúnarsdóttir og Jóhann Axel Ingólfsson) sem eru á leið í jólaboð þegar að bíllinn þeirra festist. Til að reyna að komast áfram leiðar sinnar ákveða þau að fara og banka upp á kofa sem þau finna. Þar býr Ómar Sveinn jólasveinn (Örn Árnason). Handrit og leikstjórn var í höndum Agnesar Wild og framleiðandi var Hekla Egilsdóttir. Upphafsatriðið með laginu Jólastund með Stuðkompaníinu var tekið upp í Aðalstræti á Akureyri þar sem hátt í 80 aukaleikarar tóku þátt. Þátturinn var allur tekin upp á Akureyri. Þrír af fjórum leikurum sem fóru með hlutverk voru búsettir eða fráfluttir Akureyringar og flestir sem störfuðu í upptökunum eiga rætur að rekja norður. Tökurnar stóðu yfir í fimm daga og var unnið í góðu samstarfi við Akureyrarbæ, Miðbæjarsamtökin, Freyvangsleikhúsið, Dansstúdíó Alice, Litla garð og Hof.

Aðventugleði Rásar 2

Kolbrún Vaka Helgadóttir — Fri, 02 Dec 2022 15:06:03 +0000

Rás 2 blés til árlegrar aðventugleði í Efstaleiti og fékk til góða gesti sem komu landsmönnum í jólagírinn. Siggi Gunnars, Gunna Dís, Felix Bergsson, Árni Beinteinn, Friðrik Ómar og Hulda Geirsdóttir voru í beinni útsendingu frá kl. 9 til 16. Hægt var að fylgjast með útsendingunni á Rás 2 og í streymi á RÚV.is. Fram komu: Valdimar, bræðurnir Jón Jónsson og Friðrik Dór, Sigga Beinteins, Eyþór Ingi, Guðrún Árný, Sigríður Thorlacius, Sigurður Guðmundsson og Guðmundur Óskar.

Nýtt íslenskt jóladagatal, Randalín og Mundi

Kolbrún Vaka Helgadóttir — Thu, 01 Dec 2022 15:04:47 +0000

Ný íslensk leikin þáttaröð, Randalín og Mundi: Dagar í desember, hóf göngu sína 1. desember á RÚV. Þættirnir voru svo á dagskrá daglega til 24. desember. Fimmtán ár eru síðan RÚV frumsýndi síðast nýtt íslenskt leikið jóladagatal. Silja Hauksdóttir og Ilmur Kristjánsdóttir leikstýrðu þáttaröðinni, sem byggð er á vinsælum barnabókum eftir Þórdísi Gísladóttur um vinina Randalín og Munda.

Traust fréttastofu RÚV eykst

Kolbrún Vaka Helgadóttir — Tue, 29 Nov 2022 14:59:02 +0000

Traust landsmanna á fréttaflutningi er mælt tvisvar á ári, í maí og nóvember, í samræmi við þjónustusamning RÚV og menntamálaráðuneytisins. Könnun Maskínu sem gerð var í nóvember 2022 sýnir að 69% aðspurðra bera mikið traust til fréttastofu RÚV. Um 18% segjast hvorki bera mikið né lítið traust til hennar en 13% bera lítið traust til fréttastofu RÚV. Kannanir MMR/Maskínu hafa verið gerðar með sambærilegum hætti frá 2017 og hefur traust fréttastofu aukist nokkuð frá þeim tíma. Mest mældist traust fréttastofu 75% í nóvember 2020 en minnst 64% í nóvember 2018.

Jólalögin í nóvember á Rás 2

Kolbrún Vaka Helgadóttir — Sun, 27 Nov 2022 15:00:41 +0000

Jólalögin fóru að óma á Rás 2 óvenjusnemma en ákvörðun var tekin um að byrja að spila jólalögin fyrsta sunnudag í aðventu í stað þessa að bíða til 1. desember eins og hefð var fyrir.

Nýr RÚV.is

Kolbrún Vaka Helgadóttir — Mon, 21 Nov 2022 14:55:26 +0000

Nýr RÚV.is fór í loftið í lok nóvember. Nýtt vefumsjónarkerfi var á sama tíma tekið í notkun sem skilar bættri notendaupplifun og stórbættu aðgengi. Megináhersla er lögð á þjónustu við snjalltæki. Nýr vefur er mikilvæg aðgerð í tengslum við nýja stefnu RÚV þar sem ein af megináherslunum var stafrænt RÚV.

Vetrarfrí í Útvarpsleikhúsinu vakti mikla athygli

Kolbrún Vaka Helgadóttir — Fri, 04 Nov 2022 14:52:59 +0000

Vetrarfrí, nýtt leikið hlaðvarp í átta þáttum, var frumflutt í Útvarpsleikhúsinu í byrjun nóvember. Vetrarfrí er spennandi framhaldsleikrit í átta þáttum fyrir ungt fólk eftir Hildi Knútsdóttur í leikstjórn Sigurjóns Kjartanssonar. Furðurleg drepsótt brýst út og enginn hugsar um neitt annað en að bjarga lífi sínu. Þættirnir hlutu mikla athygli og hlustun í spilara RÚV og á hlaðvarpsveitum.

Vel heppnuð ferð starfsfólks RÚV til Helsinki

Kolbrún Vaka Helgadóttir — Wed, 26 Oct 2022 14:50:09 +0000

YLE, systurstöð RÚV í Finnlandi, bauð RÚV í heimsókn í lok október og stór hópur starfsfólks hélt utan í náms- og fræðaferð. Starfsfólk fór í ferðina á eigin kostnað með aðstoð styrkja frá stéttarfélögum. Hópurinn fékk kynningu á starfsemi YLE í heild og síðan var hópnum skipt í smærri einingar sem fengu ítarlegri fræðslu og kynningu.