RÚV | Ársskýrsla |

Una Margrét hlýtur viðurkenningu fyrir þættina Blaðað í sálmabókinni

Kolbrún Vaka Helgadóttir — Sat, 23 Dec 2017 14:26:46 +0000

Una Margrét Jónsdóttir fékk í gær viðurkenningu frá Félagi fyrrverandi þjónandi presta fyrir útvarpsþáttaröð sína um sálmana í íslensku sálmabókinni.

Hátíðardagskrá RÚV

Kolbrún Vaka Helgadóttir — Fri, 22 Dec 2017 14:23:29 +0000

Boðið var upp á vandaða hátíðardagskrá fyrir alla aldurshópa í öllum miðlum RÚV um jól og áramót. Fjölbreytt tónleikadagskrá var á báðum útvarpsrásum ásamt vönduðum sérunnum þáttaröðum. Tvö framhaldsverk voru flutt í Útvarpsleikhúsinu. Í sjónvarpi var lögð sérstök áhersla á vandað og skemmtilegt dagskrárefni fyrir alla fjölskylduna, framúrskarandi erlendar kvikmyndir og metnaðarfullt menningarefni. Tvær íslenskar kvikmyndir voru frumsýndar; Hjartasteinn og Eiðurinn, frumsýnd var ný mynd um Reyni sterka og vönduð heimildarmynd um Sigurð Pálsson. Sjónvarpað var beint frá stórtónleikum Sigur Rósar í Hörpu og boðið upp á mikið úrval efnis í spilaranum RÚV yfir hátíðarnar.

http://www.ruv.is/i-umraedunni/hatidardagskra-ruv

Með allra augum hlýtur hvatningarverðlaun ÖBÍ

Kolbrún Vaka Helgadóttir — Mon, 04 Dec 2017 14:20:01 +0000

RÚV hlaut hvatningarverðlaun Öryrkjabandalags Íslands fyrir að sýna þættina Með okkar augum á besta áhorfstíma. Verndari verðlaunanna, Guðni Th. Jóhannesson forseti Íslands, afhenti þau á Hildon Nordica hótelinu 4. desember.

http://www.ruv.is/i-umraedunni/med-okkar-augum-faer-verdlaun-obi

Þrjú ráðin í stjórnunarstöður hjá RÚV

Kolbrún Vaka Helgadóttir — Fri, 01 Dec 2017 14:16:35 +0000

Fyrir rúmum mánuði var kynnt uppfært stjórnskipulag RÚV en það styður við nýja stefnu RÚV til 2021. Skipulagsbreytingarnar styrkja dagskrárþróun, framleiðslu og miðlun til stafrænnar framtíðar. Þá voru auglýst þrjú mikilvæg stjórnunarstörf laus til umsóknar. Alls bárust 76 umsóknir um störfin þrjú og eftir markvisst og vandað ráðningarferli hjá Capacent var niðurstaðan sú að Baldvin Þór Bergsson er dagskrárstjóri númiðla og Rásar 2, Birgir Sigfússon framkvæmdastjóri miðla og Steinunn Þórhallsdóttir framkvæmdastjóri framleiðslu og ferla. Öll hafa þau víðtæka menntun og reynslu sem mun nýtast vel í nýjum störfum.

http://www.ruv.is/i-umraedunni/thrju-radin-i-stjornunarstodur-hja-ruv

KrakkaRÚV sinnir barnabókmenntum og barnamenningu

Kolbrún Vaka Helgadóttir — Fri, 24 Nov 2017 14:15:18 +0000

KrakkaRÚV var með bókaumfjöllun í beinni útsendingu 24. nóvember. Útsendingin markaði upphaf verkefnisins Sögur sem er víðtækt samstarf aðila sem starfa að barnabókmenntum, læsi barna og barnamenningu. Átta krakkar skipa svokallað bókaormaráð á vegum KrakkaRÚV og hafa lesið 12 bækur eftir og undirbúið viðtöl um þær með umsjónarmönnum KrakkaRÚV. Sögum fyrir börn verður miðlað á fjölbreyttan hátt; í bókum, leikverkum, tónverkum, kvikmyndum og sjónvarpsþáttum og verða verðlaun í ýmsum flokkum á Söguverðlaununum sem verða veitt við hátíðlega athöfn í lok apríl. Krakkar kjósa flesta verðlaunahafana sjálf, fagverðlaun verða veitt og krakkarnir verðlaunaðir. Hátíðin verður í beinni útsendingu á RÚV og verður án efa ein skemmtilegasta verðlaunahátíð á Íslandi.

http://www.ruv.is/i-umraedunni/krakkar-raeda-barnabokmenntir-vid-hofunda

Nýr fréttaskýringaþáttur með áherslu á rannsóknarblaðamennsku

Kolbrún Vaka Helgadóttir — Tue, 07 Nov 2017 14:14:09 +0000

Kveikur er nýr vikulegur fréttaskýringaþáttur sem hóf göngu sína á RÚV þriðjudaginn 7. nóvember. Kveikur er svar við auknum kröfum um rannsóknarblaðamennsku og ítarlegar fréttaskýringar, innlendar sem erlendar í umsjón þaulreyndra fréttamanna RÚV.

http://www.ruv.is/i-umraedunni/nyr-frettaskyringathattur-med-aherslu-a-rannsoknarbladamennsku

Tónlistarhátíð Rásar 1 Deilt með tveimur haldin í fyrsta sinn

Kolbrún Vaka Helgadóttir — Sat, 28 Oct 2017 14:03:07 +0000

Deilt með tveimur Tónlistarhátíð Rásar 1 í samstarfi við Listasafn Reykjavíkur og Tónskáldasjóð Ríkisútvarpsins var haldin í fyrsta sinn í Hafnarhúsinu laugardaginn 28. október. Fjórir rómaðir tónlistarhöfundar völdu sér tvo listamenn hver til samstarfs og afraksturinn var tónleikar með frumfluttum verkum eftir íslensk tónskáld. Tónleikarnir voru sendir út í beinni á Rás 1 og í myndstreymi á RÚV.is. Stefnt er að því að hátíðin verði árviss viðburður.

http://www.ruv.is/frett/deila-tonleikum-med-tveimur

Öflugra og skarpara RÚV – til framtíðar

Kolbrún Vaka Helgadóttir — Thu, 26 Oct 2017 14:06:36 +0000

Uppfært stjórnskipulag RÚV var kynnt í lok október en það styrkir dagskrárþróun, framleiðslu og miðlun til stafrænnar framtíðar. Nýmiðlasvið, Rás 2 og RÚVnúll sameinast í nýmiðlasviði, sem sinnir jöfnum höndum síkvikri dagskrárgerð á vef, í útvarpi og á samfélagsmiðlum. Þá verður til nýtt framleiðslusvið með aukinni áherslu á samstarf og útleigu. Dagskrársviðin eru styrkt með nýrri stöðu, framkvæmdastjóra miðla, sem veita mun liðsstyrk við samninga- og áætlanagerð, birgðastýringu og daglegan rekstur. Sjálfstæði fréttastofunnar er einnig formfest með enn skýrari hætti í nýju skipuriti sem og skilin milli dagskrárstjórnar og framkvæmdastjórnar RÚV. Formföst dagskrárstjórn fer með óumdeilt dagskrárvald og samhliða fækkum við í framkvæmdastjórn.

http://www.ruv.is/i-umraedunni/oflugra-og-skarpara-ruv-til-framtidar

Lifun fær verðlaun á Prix Europa

Kolbrún Vaka Helgadóttir — Mon, 23 Oct 2017 14:01:45 +0000

Uppsetning Útvarpsleikhússins á framhaldsleikritinu Lifun eftir Jón Atla Jónasson hlaut þriðju verðlaun í flokki leikinna framhaldsverka fyrir útvarp á ljósvakahátíðinni Prix Europa, einni virtustu verðlaunahátíðinni á sviði fjölmiðlunar í Evrópu. Lifun fjallar um alræmdasta sakamál Íslandssögunnar; rannsóknina á hvarfi Guðmundar og Geirfinns Einarssona. Þetta er í þriðja sinn sem verk Útvarpsleikhússins hreppir þriðja sæti á hátíðinni og í annað sinn sem verk eftir Jón Atla hlýtur þann heiður því að verk hans, Djúpið, var í þriðja sæti árið 2011.

http://www.ruv.is/i-umraedunni/lifun-faer-verdlaun-a-prix-europa

Tökur hófust á Ófærð 2

Kolbrún Vaka Helgadóttir — Mon, 16 Oct 2017 14:00:31 +0000

Tökur á Ófærð 2 hófust á Siglufirði um miðjan október, en hún verður á dagskrá RÚV haustið 2018. „Þetta er eins og að fá fjölskylduna saman aftur,“ segir Ólafur Darri Ólafsson leikari og Sigurjón Kjartansson handritshöfundur lofaði nóg af hörmungum, dauða og skelfingu. Fyrri þáttaröð Ófærðar naut gífurlegra vinsælda, innanlands sem utan. Þættirnir voru meðal annars sýndir í Skandinavíu, Bretlandi, Frakklandi og Þýskalandi, við góðar undirtektir.

http://www.ruv.is/i-umraedunni/tokur-hafnar-a-ofaerd-2