Betri streymisþjónusta þar sem nettenging er hæg

30 Apr Betri streymisþjónusta þar sem nettenging er hæg

Gerðar voru ráðstafanir til að gera notendum RÚV kleift að horfa á sjónvarpsútsendingar á vefnum með minna gagnamagni en áður. Þetta var gert til að bæta þjónustu RÚV þar sem háhraðanets nýtur ekki við. Þetta á við um svæði þar sem nettengingar eru hægar, til dæmis á skuggasvæðum við þjóðveginn, í óbyggðum og á sjó. Þar getur verið gagnlegt að hafa aðgengi að útsendingu RÚV sem krefst minna gagnamagns. Áhorfendur RÚV sem hafa ekki kost á góðri nettengingu eða kjósa að nota minna gagnamagn geta nú valið að horfa á beina útsendingu sjónvarpsins með lágri bandvídd. Bandvídd er hugtak sem notað er yfir flutningsgetu nettengingar. Til þess að velja minni bandvídd þarf að smella á hnappinn „Horfa á RÚV í lágri bandvídd“ neðst við hægra hornið á spilaranum.