Kynjajafnrétti er hornsteinn í ytra og innra starfi RÚV. Unnið er að félagslegri sjálfbærni með ábyrgri umfjöllun og stefnu um fjölbreytileika, jafnrétti og þátttöku í miðlum og starfsumhverfinu.

RÚV starfar í samræmi við lög um jafna stöðu og jafnan rétt kynjanna nr. 150/2020.

Jafnréttisáætlun RÚV er staðfest af Jafnréttisstofu til þriggja ára í senn og felur í sér markmið og aðgerðir í jafnréttisstarfi innan RÚV. Áætlunin miðar að því að jafna stöðu kynja en nær einnig yfir jafnrétti óháð kynþætti, þjóðernisuppruna, trú, lífsskoðun, fötlun, starfsgetu, aldri, kynhneigð, kynvitund, kyneinkennum eða kyntjáningu í samræmi við lög nr. 86/2018 um jafna meðferð á vinnumarkaði. Gildandi jafnréttisáætlun tilgreinir 23 aðgerðir sem unnið skal að á gildistíma áætlunarinnar, m.a. um starf jafnréttisnefndar. Hlutverk nefndarinnar er að fylgjast með stöðu og þróun jafnréttismála hjá RÚV, framvindu aðgerða sem skilgreindar eru í jafnréttisáætlun, endurskoðun þeirra eftir því sem þörf krefur. Nefndin er skipuð starfsfólki víðs vegar að úr starfseminni og fundar reglulega ásamt því að miðla upplýsingum um störf sín til útvarpsstjóra og starfsfólks. Nefndin rýnir vel í niðurstöður árlegrar vinnustaðargreiningar m.t.t. viðhorfa kynja til ýmissa þátta í innra starfi. Þróuð hefur verið jafnréttis- og fjölbreytileikaskimun fyrir einstök verkefni og lögð hefur verið áhersla á að fræðsludagskrá endurspegli þessar áherslur.

RÚV hefur um árabil safnað gögnum um kynjahlutföll viðmælenda/gesta í útvarpi og sjónvarpi með það að markmiði að tryggja jafnræði þegar kemur að sýnileika í miðlum. Að auki nær viðmælendagreiningin einnig til búsetu og aldurs og upplýsingum er miðlað reglulega. Hugað er að jafnræði kynja þegar kemur að starfsfólki í fréttum og umsjón þátta í útvarpi og sjónvarpi.

RÚV hefur hlotið vottun á jafnlaunakerfi árlega síðan 2019 og unnið er jafnt og þétt að umbótum á kerfinu. Vottunin felur m.a. í sér skuldbindingu um reglubundnar launagreiningar þar sem kynbundin launamunur er greindur. Launaákvarðanir byggjast á málefnalegum forsendum og greiða skal sömu laun fyrir sambærileg og jafnverðmæt störf. Laun taka mið af eðli verkefna, kjarasamningum, kjara á markaði, ábyrgð, menntun, starfsreynslu, persónulegri hæfni og frammistöðu í starfi. Launastefnan tekur til allra starfa innan RÚV ohf. og RÚV Sölu ehf.

RÚV hefur sett starfskjarastefnu með það að markmiði að félagið sé samkeppnishæft um starfsfólk og stjórnendur. Ákvarðanir um laun skulu teknar í samræmi við samþykkt ferli um launaákvarðanir þar sem gætt er að jafnréttissjónarmiðum, ábyrgð og eðli verkefna, kjarasamningum, kjara á markaði, persónubundnum hæfniþáttum og frammistöðu í starfi.

Á RÚV er markvisst unnið að því að heilsa og vellíðan starfsfólks sé í forgrunni og tryggja skal starfsfólki öruggt og heilbrigt vinnuumhverfi. Sett hefur verið velferðarstefna sem hefur fjóra meginþætti er snúa að hreyfingu og næringu, vellíðan og velferð, jákvæð tengsl og samskipti, lærdóm og þekkingu. Samið hefur verið við fjölmarga þjónustuaðila til að veita starfsfólki þjónustu og stuðning s.s. í formi sálfræðiaðstoðar, svefnráðgjafar, ADHD og einhverfuráðgjafar, sjúkraþjálfunar og næringarráðgjafar. Lögð er rík áhersla á að mæta starfsfólki sem er að ganga í gegnum erfiða lífsburði með stuðningi og sveigjanleika.

Í reglulegri vinnustaðargreiningu er mæld afstaða starfsfólks til fjölmargra þátta í vinnuumhverfinu, niðurstöður eru kynntar og unnið er að umbótum. Einnig er viðbragðáætlun vegna eineltis, kynferðislegrar og kynbundinnar áreitni og ofbeldi (EKKO) vel kynnt og unnið eftir áætluninni í þeim málum sem upp koma á vinnustaðnum.